Misteri i vdekjes së Mirel Çokajt, 40-vjeçarit nga Malësia e Madhe i gjetur i pajetë në një humnerë në Kozhnje, po thellohet pas deklaratave të forta të të afërmve të tij. Policia ka raportuar se ngjarja ishte aksidentale, por familjarët hedhin poshtë këtë version dhe flasin për një vrasje të lidhur me parcelat e drogës në zonë.
Rifat Çokaj, ish-oficer policie dhe kushëri i viktimës, ka akuzuar hapur se Mireli ishte i përfshirë në kultivimin e drogës bashkë me persona të tjerë dhe se u shty nga shokët e tij për të mos i dhënë “pjesën që i takonte”. Sipas tij, viktima nuk ka qenë vetëm në momentin e ngjarjes dhe një prej personave që ka lajmëruar policinë e dinte saktësisht vendndodhjen e trupit, gjë që ngre dyshime për bashkëpunim.
“E kanë mbytur për të mos i dhënë hakun. Policia nuk ka ushtruar asnjë kontroll në zonën e parcelave të drogës. Aty nuk do gjendet pak, por shumë”, tha Rifat Çokaj nga SHBA.
Familjarët kërkojnë hetim të plotë të ngjarjes, duke theksuar se viktima ka qenë i dënuar më parë për çështje droge dhe i njohur për aktivitetin e tij në këtë fushë. Ata pretendojnë se policia është mjaftuar vetëm me nxjerrjen e trupit dhe me deklaratën për “aksident”, duke mos marrë në pyetje asnjë prej personave që shoqëroheshin me të.
Prokuroria ende nuk ka dhënë një qëndrim zyrtar mbi dyshimet e familjes, ndërsa ngjarja mbetet e mbuluar nga shumë pikëpyetje.