Gjykata e Fierit ka dhënë sot masat e sigurisë për të arrestuarit në kuadër të hetimeve mbi skemën piramidale online “XUEX”.
Katër prej tyre – Arbër Çela, Marius Kodra, Brunilda Ndini dhe Brunilda Todi – do të qëndrojnë në burg për 60 ditë. Ndërkohë, Emanuel Taullau dhe Flavio Mukaj do të hetohen në gjendje të lirë, me masën “detyrim paraqitje”. Dy persona të tjerë janë shpallur në kërkim nga policia.
Operacioni i koduar “XUEX” përfshiu 83 kontrolle në banesa dhe subjekte në Fier, Tiranë, Dibër, Berat dhe Gramsh. Gjatë aksionit u sekuestruan 50 celularë, 11 njësi kompjuterike, 1 DVR, 2 hard diskë, një automjet, 4.2 milionë lekë, 28 mijë euro, 1750 dollarë dhe 340 franga zvicerane. Po ashtu, u ngrinë gjashtë llogari të kriptomonedhave, që dyshohet se shërbenin për kanalizimin e të ardhurave nga aktiviteti kriminal.
Sipas hetimeve, skema funksiononte sipas modelit klasik piramidal: qytetarët që investonin duhej të sillnin të paktën pesë persona të tjerë për të rritur përfitimet e tyre. Sa më i madh numri i të rekrutuarve dhe vlera e investimit, aq më të larta premtoheshin fitimet.