Dy persona janë proceduar penalisht nga policia pas një ngjarjeje dhune në zonën e Freskut në Tiranë, ku dyshohet se kanë goditur me grushte një shtetas për motive pronësie, ndërsa një tjetër e ka kërcënuar viktimën.
Policia njofton se janë nisur procedime në gjendje të lirë për P. A., 33 vjeç, dhe S. A., 52 vjeç, ndërsa S. A., 27 vjeç është shpallur në kërkim pasi u largua nga vendi i ngjarjes me automjet.
Sipas hetimeve, shtetasi 27-vjeçar dhe kushëriri i tij 33-vjeçar kanë goditur me grushte D. K., ndërsa 52-vjeçari dyshohet se e ka kërcënuar përmes telefonit. Policia punon për kapjen e 27-vjeçarit dhe bllokimin e automjetit të përdorur gjatë arratisjes.
Ndërkohë, Drejtori i Drejtorisë Vendore të Policisë Tiranë ka urdhëruar pezullimin nga detyra të inspektorit P. M. dhe nisjen e procedurave disiplinore për mosveprim lidhur me këtë ngjarje.
Materialet proceduriale janë referuar më tej në Prokurorinë e Tiranës për veprime ligjore.