Problemet me produktet jo-ushqimore po kthehen në shqetësim serioz për shëndetin e konsumatorëve në Shqipëri dhe Kosovë. Në njoftimin e fundit të RAPEX – sistemi i alarmit të shpejtë të BE për produktet e rrezikshme – bie në sy një bojë tatuazhi që përmban arsenik dhe plumb mbi normat e lejuara.
Sipas ekspertëve, këto substanca mund të shkaktojnë kancer, dëmtime të pjellorisë, probleme në zhvillimin e fëmijëve dhe dëmtime organesh nga ekspozimi i zgjatur. Përveç kësaj, produkti nuk përfshin paralajmërimet e detyrueshme dhe përmban edhe substanca të tjera alergjike si nikel dhe metilizotiazolinon.
Lista e RAPEX përfshin gjithashtu produkte kozmetike të markave të njohura si Palette, Garnier dhe Schauma, të cilat rezultojnë të kenë përbërës të ndaluar si BMHCA, një substancë që dëmton sistemin riprodhues dhe shëndetin e fëmijës së palindur.
Këto produkte mund të gjenden edhe në tregun shqiptar dhe atë kosovar, ndaj kërkohet ndërhyrje e menjëhershme nga Inspektorati Shtetëror i Mbikëqyrjes së Tregut për heqjen e tyre.
