Një ngjarje e rëndë ka ndodhur pranë një postblloku në hyrje të qytetit të Shkodrës, ku dy persona kanë kërcënuar me fjalë dhe armë efektivët e forcave “Shqiponja” të policisë.
Gjatë një patrullimi në hyrje të qytetit, dy shtetas u ndalën pranë forcave dhe i drejtuan kërcënime të rënda, duke thënë: “Do t’ju hapim barkun me plumba”, më pas u larguan me shpejtësi.
Efektivët reaguan menjëherë dhe nisën ndjekjen e personave, të cilët u ndaluan nga Policia e Shkodrës. Të dy janë shoqëruar në komisariat për t’u marrë në pyetje.
Sipas raportimeve, njëri prej të shoqëruarve është efektiv i Forcave të Ndërhyrjes së Shpejtë (FNSH), por në momentin e kërcënimit nuk ka qenë në detyrë.
Arsyet e këtij kërcënimi mbeten të paqarta, ndërsa uniformat blu po vijojnë hetimet për zbardhjen e plotë të ngjarjes dhe përcaktimin e motiveve pas këtij akti.