Banka e Shqipërisë ka njoftuar ulje të ndjeshme të komisioneve për pagesat elektronike, duke i bërë më të leverdishme për qytetarët dhe bizneset përdorimin e kanaleve digjitale.
Sipas vendimit të ri, pagesat deri në 40,000 lekë do të kryhen pa asnjë tarifë, ndërsa për transfertat elektronike deri në 10 milionë lekë, komisionet janë reduktuar gati 10 herë.
Lehtësime të ngjashme janë aplikuar edhe për pagesat në euro, ku tarifat minimale dhe përqindjet e aplikueshme janë ulur ndjeshëm, duke afruar Shqipërinë me standardet e transfertave ndërkufitare SEPA.
Sipas llogaritjeve të Bankës së Shqipërisë, kjo nismë pritet t’u kursejë qytetarëve dhe ekonomisë shqiptare rreth 40 milionë euro në vit dhe do të krijojë bazën për integrimin e vendit në sistemin SEPA dhe implementimin e projektit TIPS Clone për pagesa të shpejta.
Nisma është përshëndetur nga partnerët ndërkombëtarë të përfshirë në projektet e modernizimit të pagesave dhe vlerësohet si një model rregullativ për bankat qendrore të rajonit.