Një hetim i nisur për aktivitetin e lojërave të fatit në Berat ka çuar në ekspozimin e një skandali që përfshin ish-drejtorin e Shërbimit Informativ, Aleksandër Shulla, dhe të birin, Pandeli Shulla.
Sipas të dhënave ekskluzive të siguruara nga gazetarja Anila Hoxha për Top Channel, gjatë kontrolleve u sekuestrua një USB në pronësi të ish-drejtorit të SHISH, e cila përmbante informacione të klasifikuara mbi automjetet, gjendjen civile të vitit 2008, si dhe të dhëna të tjera të ndjeshme të policisë kriminale dhe hetimit të krimeve të rënda.
Hetimi ka zbardhur edhe biseda komprometuese të Pandeli Shullës, ku ai diskuton hapur për lojërat e fatit:
“Ka lëvizje nga bixhozi…”, i thotë një shokut.
“Për bixhozi shqiptarët…”, ia kthen tjetri.
“Bixhoz dhe drogë…”, shton Shulla.
Në një tjetër komunikim, ai përmend edhe të atin:
“Punon plaku në SHIK, është drejtor, jo në terren”, ndërsa kur bashkëbiseduesi e ngacmon për lokalin me lojëra fati, ai i përgjigjet:
“Po pse ça e di ti, duhet një çik korrupsion brenda familjes”.
Prokuroria e ka dorëzuar çështjen në gjykatë, ku Aleksandër Shulla akuzohet për mbajtje pa leje të municioneve dhe për tregtim të sekretit shtetëror, ndërsa i biri, Pandeli Shulla, akuzohet për organizim të paligjshëm të lojërave të fatit.