Shqipëria po merr ndihmë të fuqishme nga Emiratet e Bashkuara Arabe në përballjen me situatën e jashtëzakonshme të zjarreve që ka përfshirë vendin. Dy helikopterë luftarakë të tipit “Black Hawk” të Forcës Ajrore të EBA-së janë dislokuar në bazën ajrore të Kuçovës dhe po operojnë pa ndërprerje në të gjithë territorin.
Sipas Agjencisë Kombëtare të Mbrojtjes Civile, këto mjete po japin një kontribut vendimtar në mbështetje të ekipeve nga toka, duke u përballur me flakët në disa prej vatrave më problematike.
Gjeneral brigade Mudhafar Al Amri, drejtues i Shpëtimit dhe Zjarrfikjes në Autoritetin e Mbrojtjes Civile të Abu-Dabit, vizitoi sot terrenin në Gramsh për të ndjekur nga afër operacionet, duke rikonfirmuar gatishmërinë e vendit të tij për të ndihmuar Shqipërinë deri në stabilizimin e situatës.
Drejtori i përgjithshëm i AKMC-së, Haki Çako, shprehu mirënjohjen për këtë mbështetje konkrete, e cila po sjell rezultate të prekshme në terren.
Aktualisht, në të gjithë vendin janë regjistruar 37 vatra aktive dhe operacionet nga toka e ajri vijojnë intensivisht për neutralizimin e tyre.