Policia shqiptare finalizoi operacionin ndërkombëtar “Dërgesa”, duke arrestuar 30-vjeçarin Françesk Mecaj nga Malësia e Madhe, i cili dyshohet për trafikim të armëve të zjarrit dhe municionit luftarak drejt Italisë.
Mecaj, i cili ka precedentë të mëparshëm në trafikimin e narkotikëve dhe është dënuar dy herë si drejtues i një grupi kriminal në qytezën Lecco pranë Milanos, u kap gjatë operacionit të zhvilluar në bashkëpunim me Policitë e Lezhës, Shkodrës, Gardën Financiare Italiane, Interpol Tiranën dhe Zyrën e Ekspertit të Sigurisë pranë Ambasadës Italiane.
Gjatë kontrolleve në kufirin mes Sllovenisë dhe Italisë, në bagazhet e një mikrobusi të nisur nga Shqipëria drejt Italisë u gjetën 5 armë automatike kallashnikov, qindra fishekë dhe katër krehra fishekësh. Mikrobusi ishte në pronësi të dy shtetasve E.M. dhe A.D., të cilët u ndaluan dhe shoqëruan nga autoritetet italiane.
Hetimet zbuluan se Mecaj kishte dërguar armët duke i fshehur në valixhe me sende të ndryshme, duke përdorur kompani private transporti dhe duke siguruar armë dhe municione për tregun e palëve të treta në Bashkimin Evropian.
Operacioni vijon në Shqipëri dhe Itali për të identifikuar dhe kapur personat e tjerë të përfshirë në këtë rrjet trafikimi.
Materialet ndaj Françesk Mecajt i janë kaluar Prokurorisë së Lezhës për veprën penale “Trafikim i armëve dhe municioneve luftarake”.