Futbolli portugez dhe ai botëror janë në zi pas ndarjes nga jeta të ish-kapitenit të Portos, Jorge Costa. 53-vjeçari ndërroi jetë në mënyrë të papritur mëngjesin e sotëm, pasi pësoi një atak kardiak teksa po jepte një intervistë.
Aktualisht drejtor teknik i Portos, Costa është një nga figurat më të spikatura të klubit, i njohur për rolin kyç që luajti si kapiten në epokën e artë të skuadrës nën drejtimin e José Mourinhos, kur Porto fitoi gjithçka në Portugali dhe Europë.
Sipas raportimeve, ish-futbollisti u rrëzua pa ndjenja gjatë intervistës, duke alarmuar të pranishmit. Stafi mjekësor i klubit ndërhyri menjëherë me defibrilator, ndërsa ambulanca e transportoi me urgjencë në spital. Përpjekjet për ta shpëtuar rezultuan të pafat.
Kjo nuk ishte hera e parë që Costa përballej me probleme kardiake – në vitin 2022 ai kishte pësuar një atak të ngjashëm, nga i cili kishte arritur të rimëkëmbej.
Vdekja e Jorge Costës përbën një humbje të madhe për futbollin portugez dhe ndërkombëtar. Ai do të mbahet mend si simbol i qëndrueshmërisë, lidershipit dhe suksesit me fanellën e Portos.