Një vatër zjarri është aktivizuar sot në malin e Skërficës, në territorin e Bashkisë Delvinë, duke rrezikuar përhapjen drejt zonave pyjore të mbrojtura të Pikësit dhe kufirit me Bashkinë Gjirokastër.
Shërbimi i Mbrojtjes nga Zjarri dhe Shpëtimit në Gjirokastër njoftoi menjëherë kolegët në Delvinë, të cilët kanë dërguar zjarrfikës në terren për të frenuar flakët. Terreni i thepisur dhe largësia e zonës e kanë bërë të pamundur ndërhyrjen me mjete tokësore nga Gjirokastra.
Autoritetet paralajmërojnë se, në varësi të drejtimit të erës, zjarri mund të marrë përmasa më të mëdha gjatë natës, duke kërcënuar drejtpërdrejt pyllin e mbrojtur. Një grup prej 10 zjarrfikësish do të dërgohet nesër për të vijuar përpjekjet për izolimin e flakëve, ndërsa është kërkuar edhe mbështetje nga forcat ushtarake për ndërhyrje tokësore.
Duke marrë parasysh rrezikun për dëme të parikuperueshme në zonën e mbrojtur, autoritetet e konsiderojnë urgjente ndërhyrjen nga ajri për neutralizimin e zjarrit.