Ish-zv.kryeministri Arben Ahmetaj do të përballet me drejtësinë në Gjykatën e Posaçme të Shkallës së Parë për Korrupsionin dhe Krimin e Organizuar, në kuadër të dosjes së njohur si “Buka”. Vendimi është marrë nga gjyqtari paraprak Erjon Çela, i cili ka pranuar kërkesën e SPAK për dërgimin e çështjes në gjykim.
Ahmetaj akuzohet për veprën penale të “shpërdorimit të detyrës”, parashikuar nga neni 248 i Kodit Penal. Sipas vendimit gjyqësor të datës 25 korrik 2025, çështja penale nr. 154/2022 do të shqyrtohet në themel nga trupa gjykuese e GJKKO-së.
Në vendim theksohet:
• Pranimi i kërkesës së SPAK për dërgimin në gjykim të Arben Ahmetajt;
• Formimi i fashikullit të gjykimit, përfshirë aktet e hetimit dhe të seancës paraprake;
• Dorëzimi i vendimit dhe fashikullit në sekretarinë e GJKKO brenda 10 ditëve nga shpallja;
• Ndaj këtij vendimi nuk lejohet apelimi.
Kalimi i çështjes për gjykim vjen pasi SPAK përfundoi hetimet për këtë dosje, ndërsa mbetet të shihet si do të vijojë procesi ndaj një prej figurave më të larta politike që përballet me drejtësinë pas nisjes së reformës në drejtësi.