Gjykata e Tiranës ka vendosur masën e arrestit shtëpiak për dy vëllezërit Agim dhe Florenc Domi, të cilët u arrestuan disa ditë më parë pas sekuestrimit të një sasie të konsiderueshme ushqimesh të skaduara në magazinën e kompanisë “Master AL” në Vorë.
Sipas vendimit të zbardhur të Gjykatës së Shkallës së Parë të Juridiksionit të Përgjithshëm, të dy personat do të hetohen nën masën e “arrestit në shtëpi”, ndërsa u vlerësua i ligjshëm arresti në flagrancë për veprën penale “Importimi, prodhimi, shitja dhe ruajtja e ushqimeve të rrezikshme për shëndetin ose jetën e njerëzve”.
Në kuadër të operacionit “Siguria Ushqimore”, autoritetet sekuestruan 716 koli dhe dhjetëra kilogramë produkte të përpunuara, mes tyre kroasantë dhe fruta të thata, të cilat ishin të skaduara prej muajsh. Policia dyshon se produktet ishin destinuar për t’u rihedhur në treg, pasi u ishin ndërruar etiketat dhe datat e skadencës.
Në seancën gjyqësore, të pandehurit pretenduan se mallrat nuk ishin për tregtim, por për t’u asgjësuar, sapo të kishin mundësi financiare. Pavarësisht kësaj, Prokuroria ngriti dyshime se veprimtaria e tyre përbënte rrezik serioz për shëndetin publik.
Gjykata urdhëroi lirimin e menjëhershëm të tyre nga paraburgimi dhe ndalimin e largimit nga banesa, duke vendosur që Policia Gjyqësore të mbikëqyrë zbatimin e masës së sigurisë.