Policia e Kosovës ka dhënë një version të ri për ngjarjen tragjike që çoi në vdekjen e Agon Zejnullahut, 27-vjeçari që u arrestua në mënyrë të dhunshme në Lipjan.
Në një komunikatë zyrtare, policia pretendon se viktima ishte në gjendje agresive, kishte sulmuar kalimtarë dhe kishte tentuar të hynte me forcë në automjete. Policia thotë se, për të ndaluar përshkallëzimin, zyrtarët përdorën sprai lotsjellës në vetëmbrojtje, pasi Zejnullahu, sipas tyre, ishte jobashkëpunues dhe u vërsul ndaj tyre.
Sipas njoftimit, ndihma e shpejtë ishte thirrur para ndërhyrjes policore dhe mbërriti brenda tre minutave, por ekipi mjekësor konfirmoi vdekjen në vendngjarje. Në trupin e të ndjerit u gjet edhe një sasi lënde që dyshohet për narkotikë, dërguar për analizë.
Pas ngjarjes, katër zyrtarë policorë dhe një rreshter janë pezulluar, ndërsa janë marrë në pyetje nga Inspektorati Policor i Kosovës dhe janë vendosur në mbajtje pas ri-klasifikimit të veprës penale.
Policia thotë se hetimet po vazhdojnë në bashkëpunim me Prokurorinë dhe IPK-në, ndërsa epilogu do të varet nga rezultati i obduksionit dhe analizave të tjera mjeko-ligjore.