Një ngjarje e rëndë ka ndodhur të shtunën në mbrëmje në Kaliforni, ku influencerja e njohur e fitnesit, Zamora, 40 vjeçe, është vrarë së bashku me partnerin e saj nga bashkëshorti i ndarë, Tomas Lizarraga, 45 vjeç. Ngjarja ka ndodhur në parkingun e një restoranti sushi, ndërkohë që Zamora ishte duke darkuar me partnerin e saj të ri, 43-vjeçarin Hector Garduno.
Zamora ishte nënë e 7 fëmijëve, të moshave nga 8 deri në 24 vjeç, ndërsa partneri i saj Hector ishte baba i katër fëmijëve. Sipas autoriteteve, Lizarraga kishte ndjekur për rreth një orë viktimat para se të kryente aktin fatal. Ende nuk dihet saktësisht si e kishte zbuluar vendndodhjen e tyre.
Pas të shtënave, që ndodhën në parking, skena e krimit tërhoqi vëmendjen e disa oficerëve policorë jashtë shërbimit, përfshirë një zëvendës-sherif të Qarkut San Bernardino, i cili ndodhej në trafik pranë vendngjarjes. Ai ndërhyri menjëherë, u përball me të dyshuarin dhe gjatë përleshjes Lizarraga u qëllua për vdekje nga oficeri.
Dy viktimat e tjera, Zamora dhe partneri i saj Garduno, u dërguan me urgjencë në spital, por fatkeqësisht ndërruan jetë si pasojë e plagëve.
Pak ditë para ngjarjes, Zamora kishte publikuar në rrjetin e saj social Instagram një video nga pjesëmarrja në podkastin HERizon, ku fliste hapur për vështirësitë e divorcit dhe konfliktet me ish-bashkëshortin e saj. Ajo shkroi: “Me burra si këta, kujt i duhen armiq? Në vend që të më mbështesësh, je duke u përpjekur të më shkatërrosh.”
Pas tragjedisë, vajza e saj ka hapur një fushatë në platformën GoFundMe për të mbledhur fonde për shpenzimet e funeralit dhe mbështetjen e gjashtë fëmijëve të tjerë të Zamorës. Deri të martën në mëngjes, janë mbledhur mbi 21,200 dollarë.