Makinat elektrike moderne si Lucid Air premtojnë luks, performancë dhe teknologji të avancuar — por ndonjëherë, pikërisht teknologjia mund të kthehet në problem. Një pronar amerikan i modelit Lucid Air GT, që kushton mbi 110,000 dollarë, është përballur me një situatë absurde: makina e tij nuk hapet më.
“Makina u mbyll papritur. Provuam çdo opsion – aplikacionin në telefon, çelësin inteligjent dhe kartën, por asnjë nuk funksionoi,” rrëfen pronari në grupin “Lucid Owners Club” në Facebook. Problemi u bë edhe më frustrues kur shërbimi teknik i kompanisë nuk arriti dot të lidhej me automjetin në distancë për të zgjidhur çështjen.
Për më tepër, tekniku më i afërt i Lucid në zonën e tij ndodhej me pushime, duke e lënë pronarin pa zgjidhje për disa ditë. Aktualisht, Lucid ka planifikuar transportimin e makinës në një qendër shërbimi për të tentuar reaktivizimin e saj.
Ky incident ngre shqetësime për varësinë e lartë të makinave moderne nga elektronika dhe softuerët. “Kur bateria 12 volt dështon, mungesa e një sistemi manual emergjence e bën makinën praktikisht të padobishme,” vë në dukje pronari.
Problemet e tilla nuk kufizohen vetëm te Lucid. Këtë javë edhe Ford njoftoi tërheqjen e qindra mijëra Mustang Mach-E për shkak të defekteve në sistemin e dyerve, që mund të bllokohen në rast të dështimit të baterisë ndihmëse.
Teksa makinat elektrike përparojnë me shpejtësi, ky rast tregon se sfidat e besueshmërisë teknologjike mbeten ende të hapura, veçanërisht për blerësit që paguajnë çmime luksi dhe presin funksionim të përsosur.