Mbledhja e Komisionit të Stabilizim-Asociimit mes Parlamentit Europian dhe Kuvendit të Shqipërisë në Strasburg përfundoi pa arritur një deklaratë të përbashkët, duke reflektuar ndarjet e thella mes mazhorancës socialiste dhe opozitës së djathtë.
Deputetja e Partisë Demokratike dhe kryetare e Komisionit të Çështjeve Europiane, Jorida Tabaku, deklaroi pas mbledhjes se opozita ka ngritur shqetësime serioze mbi problematikat që lidhen me procesin zgjedhor, mungesën e sundimit të ligjit, korrupsionin e përhapur dhe abuzimet me tenderat publikë.
“Nuk jemi në Strasburg për të firmosur deklarata për sy e faqe, por për të kërkuar ndryshime reale që prekin jetën e qytetarëve”, u shpreh Tabaku, duke shtuar se procesi i integrimit duhet të reflektohet në përditshmërinë e qytetarëve dhe jo të mbetet vetëm retorikë politike.
Ajo nënvizoi se nuk mund të ketë integrim të vërtetë pa zgjedhje të lira, demokraci funksionale dhe reforma të thella antikorrupsion. “Rruga europiane nuk është një slogan, por një betejë për standarde dhe ndryshim të prekshëm për çdo qytetar shqiptar”, theksoi Tabaku.
Për opozitën, bashkëpunimi me Bashkimin Europian duhet të bazohet mbi angazhime të sinqerta dhe reforma të mirëfillta, dhe jo në fasada politike.