Një skenë prekëse u zhvillua gjatë ceremonisë mortore të Ajay Ramesh, viktimës së aksidentit ajror në Indi. Britaniku Vishwashkumar Ramesh, i vetmi që arriti të mbijetojë nga përplasja fatale e avionit të Air India, mori pjesë i përlotur në varrimin e vëllait të tij.
Me plagë ende të dukshme në fytyrë dhe krah, Ramesh mbajti mbi sup arkivolin e Ajay-t, ndërsa familjarë, të afërm dhe banorë të shumtë i dhanë lamtumirën e fundit.
Aksidenti ndodhi vetëm pak sekonda pas ngritjes së avionit “Boeing 787-8 Dreamliner” nga aeroporti i Ahmedabadit, gjatë fluturimit drejt Londrës. Në tragjedinë e rëndë humbën jetën të paktën 270 persona, përfshirë pasagjerë dhe banorë të një konvikti mjekësh, mbi të cilin avioni u përplas.
Mrekullisht, Vishwashkumar Ramesh, i cili ndodhej në vendin 11A, arriti të shpëtonte. Pamjet dramatike tregojnë momentin kur punonjësi i ambulancës, Satinder Singh Sandhu, e ndihmonte të largohej mes flakëve dhe tymit. Sandhu rrëfeu se fillimisht nuk e kishte kuptuar se po ndihmonte të vetmin të mbijetuar të aksidentit.
“Kur e futa në ambulancë, më tha mes lotësh se brenda avionit ndodhej edhe vëllai i tij dhe donte të kthehej për ta kërkuar,” kujton Sandhu.
Në një intervistë për televizionin indian DD News, Ramesh tha: “Për një moment mendova se po vdisja. Kur hapa sytë, nuk e besoja që isha ende gjallë.”
Shkaqet e aksidentit vazhdojnë të mbeten të paqarta, ndërsa hetuesit po analizojnë të dhënat e “kutisë së zezë” për të zbuluar arsyet e tragjedisë.