Prokuroria e Posaçme Kundër Korrupsionit dhe Krimit të Organizuar (SPAK) ka përfunduar hetimet për një skemë të gjerë korrupsioni, mashtrimi dhe pastrimi parash në tendera publikë, e cila përfshin 22 persona dhe dy subjekte juridike. Më datë 2 qershor 2025, SPAK ka depozituar kërkesën për dërgimin për gjykim të çështjes penale nr. 214/1 të vitit 2023.
Në qendër të hetimeve ndodhet ish-Drejtori i Përgjithshëm i Agjencisë për Efiçencën e Energjisë dhe më pas i Autoritetit Rrugor Shqiptar, Evis Berberi, i cili akuzohet për korrupsion pasiv (gjashtë herë), shkelje të barazisë në tendera (katër herë), si dhe pastrim parash në bashkëpunim dhe në mënyrë të përsëritur. Sipas SPAK, ai ka qenë pronar de facto i kompanisë “DAAM” sh.p.k, të cilën e ka regjistruar në emër të personave të tjerë për të fshehur lidhjen direkte me të, ndërsa në të njëjtën kohë ka ushtruar funksione publike dhe ka favorizuar këtë kompani në tendera shtetërorë.
Të pandehur të tjerë përfshijnë:
Valter Begaj, pronar i shoqërisë “Net Group” sh.p.k, akuzohet për korrupsion aktiv, mashtrim me pasoja të rënda, falsifikim dokumentesh dhe pastrim parash.
Ervis Lami, Brunilda Buli, Gentian Gjyli, Bledar Aliaj, Blerta Musabelli, dhe shumë të tjerë, janë të përfshirë në vepra të ndryshme penale si korrupsion aktiv, falsifikim dokumentesh, shpërdorim detyre dhe shkelje të barazisë në tendera.
Në total, janë hetuar shtatë procedura prokurimi të zhvilluara në periudhën 2020–2022 në dy institucione shtetërore: Agjencia për Efiçencën e Energjisë dhe Autoriteti Rrugor Shqiptar. Disa nga tenderat përfshijnë:
Projekti GOAL – 29,800 euro
Studime për kulla karikimi për automjete elektrike – mbi 130 milionë lekë në total
Mbikëqyrje për tunelin e Llogarasë – mbi 196 milionë lekë
Supervizime rrugore dhe ndriçim urban – dhjetëra milionë lekë
Sipas SPAK, Evis Berberi ka përdorur pozitën zyrtare për të ndikuar proceset e prokurimit, duke favorizuar kompanitë “DAAM” dhe “Net Group”, në këmbim të përfitimeve financiare. Ai ka kontrolluar aktivitetin financiar të shoqërisë “DAAM” edhe pas kalimit formal të pronësisë, ka përdorur llogaritë e saj për shpenzime personale dhe ka marrë vendime mbi punësimet dhe aktivitetin tregtar të kompanisë.
Kjo çështje u hetua mbi bazën e referimeve nga Byroja Kombëtare e Hetimit dhe përfshin përdorimin e teknikave speciale, sekuestrime, analiza të provave dixhitale dhe transaksione financiare.