Dritan Gjika, i konsideruar si drejtuesi i mafies shqiptare në Ekuador, është arrestuar në Abu Dhabi gjatë një operacioni ndërkombëtar, njoftoi Ministria e Brendshme ekuadoriane.
47-vjeçari shqiptar ishte në kërkim nga Interpol për trafik droge, pastrim parash dhe krim të organizuar. Autoritetet e Ekuadorit e identifikojnë atë si kreun e një rrjeti që trafikon sasi të mëdha droge drejt Amerikës Qendrore dhe Europës, me aktivitet të shtrirë në Ekuador dhe Spanjë.
Në shkurt 2024, Prokuroria e Ekuadorit e cilësoi Gjikën si udhëheqës të mafias shqiptare në vend, por ai kishte shmangur arrestimin. Ndërkohë, në janar 2024, tetë bashkëpunëtorë të tij u dënuan me rreth 17 vite burg për përfshirje në të njëjtin rrjet kriminal.
Autoritetet presin tani ekstradimin e tij për t’u përballur me drejtësinë.