VLORË– Një shëtitje në det mund të kishte përfunduar në një tragjedi, por policia Kufitare e Vlorës ka reaguar me shpejtësi dhe profesionalizëm duke ju ardhur në ndihmë disa shtetasve që udhëtonin me një veliere.
Jeta e tyre rrezikohej nga moti i keq dhe dallgët e larta. Bazuar në njoftimin e policisë mësohet se ngjarja ka ndodhur mbrëmjen e djeshme, rreth orës 19:20, DVKM Vlorë ka marrë njoftim se një tjetër veliere, që ndodhej rreth 3 milje në perëndim të Ishullit të Sazanit, kishte vështirësi në lundrim, për shkak të përkeqësimit të kushteve atmosferike dhe errësirës, dhe personat në bordin e saj po rrezikoheshin.
Menjëherë pas marrjes së njoftimit, u organizua ndërhyrja nga mjeti lundrues i Stacionit të Mjeteve Lundruese Triport, i cili u nis drejt koordinatave të raportuara.
Rreth orës 20:20, veliera u lokalizua dhe u shoqërua në mënyrë të sigurt në brendësi të Gjirit të Vlorës, ku ndaloi në zonën e “Bove”, pranë Plazhit të Vjetër. Nga komunikimi me ekuipazhin, rezultoi se shtetasit ndodheshin në gjendje të mirë shëndetësore.
Policia Kufitare vijon të qëndrojë në gatishmëri të plotë, 24/7, në shërbim të qytetarëve dhe turistëve./Radar.al
Zbulohet “shtëpi bari” në Fier/ Arrestohet pronari i banesës dhe punonjësi i OSHEE