Adi Çoba, 34-vjeçari nga Durrësi, është zbuluar si një figurë kyçe në një rrjet ndërkombëtar trafiku droge, në kuadër të operacionit “Ura”. I njohur me nofkat “Bazholi”, “Bisha”, “I shëndoshi” dhe “Cigani”, Çoba është përmendur si drejtues i trafikut të kokainës drejt Italisë, sipas të dhënave të mbledhura nga autoritetet italiane dhe dëshmisë së të penduarit të drejtësisë, Nuredin Dumani.
Në rrëfimin e tij, Dumani konfirmon njohjen me Çobën përmes kontakteve me Fatmir Troplinin, i njohur ndryshe si “Miri”, një emër me ndikim në botën e krimit dhe bashkëpunëtor i afërt i Çobës. Sipas Dumanit, Miri e përmendte shpesh “Bazholin” në biseda dhe kishte tentuar ta përdorte për të lokalizuar dhe eliminuar një person tjetër nga Durrësi, me nofkën “Çaponi”, i cili ishte mik i një kundërshtari të Mirit.
Hetuesit kanë zbuluar se komunikimi mes këtyre personave bëhej përmes aplikacionit të koduar SkyECC, ku Çoba përdorte kanale të siguruara për të organizuar trafikun e drogës dhe për të ndjekur lëvizjet e rivalëve.
Dosja e autoriteteve italiane e përshkruan Adi Çobën si organizatorin dhe drejtuesin e rrjetit kriminal që dërgonte sasi të mëdha heroine dhe kokaine nga Shqipëria dhe Holanda drejt Italisë, duke përdorur korrierë të përzgjedhur dhe të dërguar nga vetë ai. Ai drejtonte aktivitetin nga Durrësi dhe ishte në kontakt të vazhdueshëm me anëtarë të tjerë të rrjetit në territorin italian.
Hetimet tregojnë se Çoba ishte emër i panjohur për autoritetet shqiptare deri në këtë operacion, duke dëshmuar nivelin e lartë të fshehtësisë dhe strukturës së organizuar të grupit të tij kriminal.