Strukturat e drejtësisë dhe hetimit po intensifikojnë përpjekjet për të garantuar një proces zgjedhor të ndershëm në zgjedhjet e 11 majit. Përfaqësues të Strukturës së Posaçme Kundër Korrupsionit dhe Krimit të Organizuar (SPAK) dhe të Byrosë Kombëtare të Hetimit (BKH) zhvilluan këtë të shtunë një tjetër vizitë pune në qytetin e Elbasanit.
Ata u takuan me Drejtuesin e Prokurorisë së Rrethit, Kreshnik Ajazi, si dhe me Drejtorin e Policisë Vendore, Fatmir Hoxha. Në qendër të diskutimeve ishin problematikat në rritje që lidhen me zgjedhjet, përfshirë denoncimet për blerje votash, presion ndaj zgjedhësve dhe përdorim të burimeve shtetërore në funksion të fushatës.
Burime pranë takimit konfirmuan se janë analizuar masat konkrete për parandalimin dhe ndëshkimin e çdo tentative për manipulim të procesit zgjedhor. Përfaqësuesit e SPAK dhe BKH kërkuan bashkëpunim maksimal nga institucionet vendore të rendit dhe drejtësisë, me theks të veçantë te monitorimi në terren, sidomos në zonat e konsideruara si më problematike.
Gjithashtu, u nënvizua rëndësia e krijimit të një klime besimi për qytetarët që dëshirojnë të raportojnë shkelje, duke garantuar mbrojtje dhe konfidencialitet të plotë për çdo kallëzim.
Kjo është vizita e dytë e këtyre strukturave në Elbasan në prag të zgjedhjeve, një qark që mbetet nën vëzhgim të shtuar për shkak të historikut të përfshirjes së elementëve kriminalë në procese zgjedhore të mëparshme. Autoritetet kanë garantuar se çdo shkelje e ligjit do të trajtohet me vendosmëri dhe pa asnjë tolerancë.