Një skandal i bujshëm ka tronditur Formula 1 këtë javë, pasi Oliver Oakes, 37-vjeçari britanik dhe shef i skuadrës Alpine, dha dorëheqjen të martën në mënyrë të papritur, duke i hapur rrugë rikthimit të italianit Flavio Briatore në drejtim.
Dorëheqja e Oakes erdhi menjëherë pas garës në Majemi dhe u justifikua zyrtarisht me “arsye personale”, por mediat britanike kanë zbuluar prapaskena që e lidhin këtë lëvizje me një çështje të rëndë penale që përfshin vëllain e tij, William Oakes.
Sipas The Telegraph, më 2 maj, William u arrestua në Silverstone nën akuzën për pastrim parash, pasi policia i gjeti një sasi të madhe parash në bagazhin e makinës. Ai është bashkëdrejtues i skuadrës Hitach Grand Prix, e cila më parë ka qenë në pronësi të përbashkët me Oliverin.
Më tej, zbulohet se Hitach GP ka pasur lidhje me oligarkun rus Dmitry Mazepin, babai i pilotit Nikita Mazepin dhe një figurë e njohur e afërt me presidentin Vladimir Putin. Në shkurt 2022, vetëm tre ditë para se Britania të vendoste sanksione ndaj rrethit të Putinit dhe nëntë ditë para nisjes së pushtimit rus në Ukrainë, Oliver Oakes bleu aksionet e Mazepin, duke marrë kontrollin e plotë të ekipit – një veprim që më vonë u përmend edhe në Parlamentin britanik.
Aktualisht, nuk ka prova që lidhin drejtpërdrejt Oliverin me aktivitetet kriminale të dyshuara të vëllait të tij, por fakti që ai udhëtoi menjëherë drejt Dubait pas garës në Majemi dhe është zhdukur nga skena publike, ka ngritur shumë pikëpyetje. Autoritetet nuk kanë dhënë ende ndonjë deklaratë zyrtare mbi këtë çështje.