Kryeministri Edi Rama ka përmbyllur fushatën elektorale duke theksuar se kjo ditë, 9 maj – Dita e Europës, ka një simbolikë të veçantë. Ai shprehu mirënjohjen për mbështetjen e qytetarëve dhe theksoi se ky moment përkon me kulmin e një rrugëtimi katërvjeçar për afrimin e Shqipërisë me Bashkimin Europian.
Rama e konsideroi të rëndësishme që në këtë ditë të nënshkruhet “marrëveshja për Shqipërinë në BE”, duke nënkuptuar se fitorja në zgjedhje do të jetë një hap i rëndësishëm në këtë proces historik.
“Ju jam mirënjohës për praninë tuaj në këtë fushë dhe u rikthyem këtu e gjithë skuadra e Tiranës tonë, jo thjesht në takimin përmbyllës të një tjetër beteje zgjedhore, por në kulmin e një tjetër rrugëtimi 4-vjecar ngjitjeje lart drejt majës ku ndodhet Shqipëria Europës së Bashkuar.
Unë nuk besoj se është rastësi dhe nuk besoj se është rastësi që jemi sot këtu në 9 maj, në ditën e Europës për të thënë fjalën e fundit të këtij rrugëtimi dhe pastaj për të shkuar së bashku me shumicën dërmuese të shqiptarëve në kutitë e votimit, për të firmosur aty marrëveshjen tonë të madhe për Shqipërinë në BE”, tha Rama.