Kryeministri Edi Rama ka reaguar me ironi ndaj lajmeve të qarkulluara në rrjet se Sali Berisha mund të ketë marrë leje për të udhëtuar drejt SHBA-së, pas vendosjes së masës “non grata” nga Departamenti i Shtetit.
Përmes një postimi në rrjetet sociale, Rama e cilësoi këtë një tjetër “tallje të Bufit me lukuninë e kënetës”, duke përqeshur entuziazmin që ka shoqëruar lajmin në radhët e opozitës. Me një gjuhë plot sarkazëm, kreu i qeverisë shkruan:
“Thashë se ia hoqën vërtet damkën, të shpëtonte Shqipëria nga një turp i pashembullt, po aha, hiç, qenkej një tjetër nga ato talljet e Bufit me lukuninë e Kënetës…”
Duke e quajtur Berishën “Bufi”, Rama nënvizon se mbështetësit e tij “vazhdojnë të besojnë verbërisht, edhe kur ai përçartet në mënyrë të rrjedhur rrugëve.”
“Këneta sheh ëndrra madhështore me rrugë qumështi dhe mëndafshi, ku oqeani bëhet kos dhe kapelja trampiste e Bufit shumëfishohet në miliona tenxhere floriri me mbishkrimin USA,” ironizon më tej kryeministri.