Tensionet politike mes Lindjes dhe Perëndimit po reflektohen edhe në hapësirën ajrore. Pas Lituanisë, edhe Letonia ka ndaluar fluturimin e një aeroplani serb me destinacion Moskën, që po transportonte presidentin Aleksandar Vuçiç.
Sipas autoriteteve letoneze, ndalimi është bërë për shkak të “ndjeshmërisë politike të qëllimit të fluturimit”. Më herët, Lituania e justifikoi vendimin e saj me arsye “teknike dhe diplomatike”.
Ky nuk është rasti i vetëm i ngjashëm: edhe kryeministrit sllovak Robert Fico i është ndaluar fluturimi mbi Poloni dhe Lituani, në përpjekje për të mos lejuar pjesëmarrjen e tij në ceremoninë e 80-vjetorit të fitores ndaj nazizmit në Moskë.
Ndërkohë, Kremlini ka konfirmuar se presidenti rus Vladimir Putin do të zhvillojë bisedime dypalëshe me presidentin serb më 9 maj, pavarësisht pengesave në rrugën e tij për atje.