Në Shqipëri, kjo e shtunë është shpallur ditë zie kombëtare në nderim të Papa Françeskut. Në përputhje me vendimin e qeverisë, flamujt në të gjitha institucionet shtetërore janë ulur në gjysmështizë.
Në shenjë respekti për figurën e Papës, Partia Socialiste ka vendosur të pezullojë aktivitetet elektorale të planifikuara për sot, në kuadër të fushatës për zgjedhjet e 11 majit. Kryeministri Edi Rama, i cili kishte parashikuar një vizitë në Qarkun e Fierit, ka anuluar udhëtimin.
Në anën tjetër, kryetari i Partisë Demokratike, Sali Berisha, ka njoftuar se do të vazhdojë takimet e fushatës, duke respektuar rregullat e mortit: çdo aktivitet do të nisë me një minutë heshtje dhe nuk do të shoqërohet me muzikë festive.
Në ceremoninë mortore në Vatikan, Shqipëria përfaqësohet nga Presidenti Bajram Begaj me bashkëshorten e tij, ministri për Evropën dhe Punët e Jashtme Igli Hasani, ministrja e Shtetit për Marrëdhëniet me Parlamentin Adea Pirdenji, ambasadorja Majlinda Frangaj, si dhe udhëheqësit e komuniteteve fetare në vend: Arjan Dodaj, Bujar Spahiu, Haxhi Dede Edmond Brahimaj dhe Joani.