Policia belge ka arrestuar një politikani 27-vjeçar shqiptar, i identifikuar si Amarildo Vllazëria, pas një operacioni anti-drogë, të iniciuar nga zbulimi i bisedave në “Sky ECC”.
Vllazëria, i cili rezulton të jetë ish-Kryetari i Komunës Mortsel në Belgjikë, u arrestua si pjesë e një hetimi të nisur pas mesazheve të hakuara nga platforma famëkeqe “Sky ECC”. Banda e shënjestruar mësohet se është përfshirë në import dhe eksport të drogës si dhe transportin e tyre në periudhën 2020-2021. Një kontroll shtëpie është bërë edhe pranë qytetit Mortsel.
Ish-kryetari nuk u rizgjodh këtë mandat legjislativ, por do të bënte betimin si këshilltar bashkiak të martën në mbrëmje për disa muaj, duke zëvendësuar një koleg partiak. Kjo nuk ndodhi për shkak të arrestimit.
“Të tre personat e arrestuar, janë anëtarë të një organizate kriminale të përfshirë në importin dhe tranzitin e kokainës përmes portit të Antwerpit”, konkludoi policia nga mesazhet e deshifruara të bisedës. Ata u arrestuan pasi policia kreu pesë kontrolle në shtëpi. Gjithashtu janë sekuestruar mallra të ndryshme luksi, telefona dhe një shumë prej 9 mijë eurosh. Bashkia e Mortsel u kontrollua gjithashtu.
Amarildo Vllazëria është këshilltar bashkiak që nga viti 2018 dhe në tetor 2023 u bë kryetar komune në Mortsel. Ai ishte gjithashtu kryetar i komitetit special të shërbimeve sociale në atë kohë dhe ishte anëtar i këshillit të policisë.
150 kilogramë kokainë
Policia beson se Vllazëria dhe dy burrat e tjerë janë përfshirë në importimin e të paktën 150 kilogramëve kokainë në vitet 2020 dhe 2021. Ata gjithashtu thuhet se kishin planifikuar ta transportonin drogën jashtë vendit me automjete me ndarje të fshehura.
U fol edhe për ngritjen e një plantacioni kanabisi. Tashmë policia po heton ndër të tjera nëse Vllazeria ka abuzuar me detyrën në bashki për këtë qëllim.