Kombëtarja shqiptare mbrëmjen e së premtes do të startojë aventurën e saj për kualifikueset e Kupës së Botës 2026.
Kuqezinjtë pritet të përballen me Anglinë, një ndeshje e cila është parashikuar të ketë mjaft ritëm dhe presion nga ana e vendasve, të cilët gjithashtu kërkojnë tre pikëshin për ta nisur mbarë.
Trajneri i kombëtares Silvinjo në një konferencë për mediat të dhënë pasditen e sotme komentoi më shumë mbi këtë ndeshje.
Trajneri, njëjtë si Kane, e cilësoi këtë përballje si të vështirë por të veçantë.
“Kemi pasur disa probleme me Ismajlin dhe Kumbullën gjatë javës. Pasditen e sotme do të kemi stërvitjen e fundit që do të vlerësojmë lojtarët. Kemi edhe opsione të tjera si Ajeti dhe Mihaj dhe do marrim një vendim.Do të jetë e vështirë, por dhe e këndshme. E vërtetë që nuk kemi shumë kohë për t’u përgatitur. E kemi diskutuar dhe mes trajnerësh në FIFA, sa e vështirë është. Mos harrojmë që kemi ndeshje dhe ndaj Andorrës. Do jetë e vështirë sepse nuk ka mjaftueshëm kohë. Kemi përdorur video, diskutime me lojtarët, ato vijnë të lodhur duke qenë se kanë sezone të gjata. Nesër do vendosim për titullarët”, tha Silvinjo.