Gjykata e Lartë ka refuzuar kërkesën e Kejvina Kthellës për rikthimin e makinës së sekuestruar nga GJKKO.
Më 8 shkurt, Gjykata e Posaçme kundër Korrupsionit dhe Krimit të Organizuar pranoi kërkesën e SPAK për konfiskimin e 9 pasurive të Redjan Rrajës dhe familjarëve të tij, duke përfshirë edhe makinën luksoze ‘Audi’ që ai i kishte dhuruar modeles Kejvina Kthella.
Në hetimin pasuror të Redjan Rrajës, i cili është dënuar përjetë për atentatin ndaj prokurorit Arjan Ndoja në vitin 2019 në Durrës, SPAK theksoi se këto pasuri janë blerë me para që vinin nga veprimtari të jashtëligjshme.
Pasuritë e konfiskuara përfshijnë 5 pasuri të paluajtshme, nga të cilat 3 janë në emër të bashkëshortes së tij, Marsela Çiça. Përveç kësaj, janë sekuestruar dhe 2 automjete: njëri në emër të Redjan Rrajës dhe një Audi që i është marrë Kejvina Kthellës në nëntor 2019. Ndër pasuritë e konfiskuara janë gjithashtu një orë Rolex dhe 2750 euro.