Propozimi i Partisë Demokratike për të siguruar të drejtën e votës për diasporën është një hap i rëndësishëm drejt përfshirjes së komunitetit shqiptar të jashtëm në proceset demokratike të vendit. Kështu u shpreh Nënkryetari i PD, Oerd Bylykbashi. Ai ka qartësuar se grupi i madh i shqiptarëve që jetojnë në vende të tjera – rreth 1.8 milionë persona duhet të votojnë.
“Kushdo janë emigrant, është student, është ushtarak, janë me punë për një afat të gjatë dhe ndodhet jashtë Shqipërisë të ketë të drejtën për tu regjistruar dhe për të votuar”, deklaroi Bylykbashi.
Bylykbashi shpjegon se është kundër draftit të propozuar nga socialistët për votën e diasporës, sepse sipas tij, kjo dispozitë kërkon që votuesit potencialë të kenë një adresë të ligjshme, e cila mund të privojë shumë shqiptarë që jetojnë jashtë vendit nga të drejtat e tyre zgjedhore.
Ky kusht, sipas tij, i detyron shqiptarët e jashtëm që të kenë një adresë të rregullt për të mundur të votojnë, duke e bërë kështu procesin më të vështirë për ata që nuk kanë një adresë të rregullt për shkak të situatave të ndryshme, si p.sh. emigracioni ose statusi i tyre juridik në vendin ku jetojnë.
Gjithashtu ai shprehet se:
“Ne kundërshtojmë në mënyrë absolute kufizimin që i vë PS me propozimin e saj emigrantëve, duke u thënë ju mund të votoni vetëm nëse ju jeni të regjistruar në mënyrë të ligjshme në shtetin ku jetoni. Këta janë shqiptarë, shtetas shqiptarë që jetojnë jashtë në mënyrë të ligjshme apo të paligjshme po të drejtën e votës në Shqipëri e kanë gjithmonë të ligjshme me kushtetutë”.
Tashmë që socialistët kanë mbyllur çdo shteg negociatë për realizimin e një reforme të plotë zgjedhore, Oerd Bylykbashi deklaron se qysh në krye të herës qëllimi i kryeministrit Edi Rama ka qenë i qartë.
‘Objektivi ishte mbajtja e status quos. Atë që ai e ka rrëmbyer, do ta mbajë në atë formë sepse është e vetmja mënyrë që të marrë pushtetin jo domosdoshmërisht me votë por; nëpërmjet shitblerjes së votës, presionit mbi zgjedhësit për të mos dalë për të votuar, presionit për të dalë për të votuar siç do qeveria, përdorimit të çdo lloj instrumenti shtetëror për të ushtruar trysni, cenimin e sekretit të votës; dhe të gjitha ato shkelje që I gjeni tek rekomandimet e para të ODIHR.’
Mbledhja e fundit e parlamentit para se deputetët të nisin pushimet është në 25 korrik dhe mbetet për p’u parë nëse socialistët e demokratët do të gjejnë konsensus për votën e diasporës apo vota e shqiptarëve që jetojnë jashtë vendit do të veshtoje njësoj si reforma elektorale.