Një rast shqetësues ka tronditur qytetin e Shkodrës, ku një 13-vjeçar akuzohet për dhunë të vazhdueshme ndaj bashkëmoshatarëve dhe grabitje ndaj të moshuarve, duke u marrë para dhe sende personale.
Denoncimi erdhi në redaksinë e emisionit investigativ “Fiks Fare” nga një nënë, e cila tregon se djali i saj, nxënës i klasës së tetë, jeton i terrorizuar dhe nuk guxon të dalë i vetëm nga shtëpia. Edhe babai është detyruar të lërë punën për ta shoqëruar çdo ditë në shkollë.
Sipas denoncimit, 13-vjeçari detyron fëmijë të tjerë të dorëzojnë sende personale, i kërcënon dhe disa herë ka përdorur dhunë fizike. Pamjet e siguruara nga “Fiks Fare” tregojnë të miturin teksa rrëzon biçikletën e një të moshuari, hedh sendet në tokë dhe merr portofolin, duke u larguar pa pengesa.
Nga ana tjetër, nëna e 13-vjeçarit e justifikon sjelljen e tij me hiperaktivitetin dhe pohon se është në dijeni të shoqërimeve të tij në komisariat. Shkolla ka ndërhyrë me ndihmën e psikologëve, por sipas saj, ndërhyrja ka qenë e kufizuar. Drejtuesit e institucionit ku ndjek mësimin i mituri thonë se ai sillet rregullisht brenda ambientit të shkollës, megjithatë ka pasur mungesa të shpeshta.
Burime nga policia bëjnë me dije se i mituri është referuar katër herë në prokurori në gjashtë muaj për veprën penale “Vjedhje”. Por, sipas ligjit shqiptar (neni 12 i Kodit Penal), individët nën moshën 14 vjeç nuk mbajnë përgjegjësi penale, çka e vështirëson ndërhyrjen ligjore. Prokuroria njofton se çështja po hetohet.