Gjykata e Posaçme Kundër Korrupsionit dhe Krimit të Organizuar ka dënuar Shkëlzen Dacin me 12 vite burg, për kryerjen e veprave penale “Trafikim i narkotikëve” në bashkëpunim dhe për pjesëmarrje në grup të strukturuar kriminal.
Dënimi fillestar është reduktuar në 8 vite burg për shkak të gjykimit të shkurtuar dhe do të ekzekutohet në një burg të sigurisë së lartë.
Vendimi u mor nga trupi gjykues i përbërë nga gjyqtarët Alfred Konomi, Sokol Pasho dhe Migena Laska. Gjykata gjithashtu ngarkoi Dacin me shpenzimet procedurale dhe autorizoi Prokurorinë e Posaçme për ekzekutimin e vendimit.
Kundër këtij vendimi lejohet ankim brenda 15 ditëve në Gjykatën e Posaçme të Apelit për Korrupsionin dhe Krimin e Organizuar.