Detaje të reja janë zbuluar për ekzekutimin e 44-vjeçarit shqiptar Artur Tushi, i njohur me nofkën “Qoti”, i vrarë disa ditë më parë në qytetin Medelin të Kolumbisë. Ngjarja ka ndodhur pranë banesës së tij, ku një killer me pagesë e qëlloi plot 11 herë, duke i marrë jetën në vend.
Autoritetet kolumbiane kanë njoftuar se autori i dyshuar, një 35-vjeçar me origjinë venezueliane, u arrestua 19 kilometra larg vendit të krimit. Sipas policisë, ai ishte paguar në dollarë për të kryer ekzekutimin, fakt që ngre dyshime për një sfond kriminal ndërkombëtar dhe përfshirjen e rrjeteve të trafikut të drogës në Amerikën Latine.
Nga Lezha në Medelin, rruga e dyshimtë e “Qotit”
Artur Tushi ishte me origjinë nga fshati Rraboshtë i Lezhës, por kishte jetuar për një kohë të gjatë në Itali. Emri i tij nuk është i panjohur për autoritetet shqiptare: në vitin 2017, ai u rrëmbye në zonën mes Fushë-Milotit dhe Milot–Burrelit, teksa udhëtonte me makinën e tij. Personat që e rrëmbyen i vendosën një qese në kokë dhe e mbajtën peng në një banesë, ndërsa i morën rreth 200 mijë lekë.
Në atë kohë, policia shqiptare konfirmoi se Tushi nuk kishte precedentë penalë në Shqipëri apo Itali, por dyshohej për lidhje me veprimtari të paligjshme jashtë vendit. Hetimet ndërkombëtare që pasuan zbuluan se ai ishte nën hetim në Ekuador dhe Spanjë për dhunë fizike dhe posedim droge.
Sipas burimeve nga Interpol dhe autoriteteve kolumbiane, Tushi mund të ketë qenë i përfshirë në rrjete narkotrafiku në Amerikën Latine. Ekzekutimi i tij me shumë të shtëna pranë banesës tregon një atentat të mirëorganizuar, tipik për llogaritë kriminale brenda karteleve.