Me rastin e 105-vjetorit të lindjes së profesorit të drejstësisë, Ismet Elezi, ditën e sotme u organizua një ceremoni e posaçme në të cilën mori pjesë dhe Presidenti i Republikës, Bajram Begaj.
Në nderim të profesor Elezit për kontributin e tij në ndërtimin e të Drejtës Penale në shtetin modern shqiptar dhe në edukimin e brezave të studentëve, presidenti në fjalën e tij theksoi se modele të tilla marrin një peshë të madhe në një kohë kur drejtësia e re shqiptare po kalon procesin më të rëndësishëm të transformimit në epokën e demokracisë.
“Profesor Ismeti është vetë historia e gjallë e shkollës juridike shqiptare. Ai ka qenë model në përkushtimin ndaj dijes dhe edukimit të brezave të rinj”, vlerësoi Begaj.
Më tej Begaj u shpreh se “drejtësia e re ka gjithashtu, nevojë për gurët e vet kilometrikë për modele dhe shembuj të integritetit e profesionalizmit”.
Referuar më tej procesit të transformimit të këtij sistemi në Shqipëri, Presidenti i Republikës vlerësoi arritjet e deritanishme.
“Në 10 vitet e fundit vendi ka njohur Reformën në Drejtësi që, për nga përmasa, ndikimi, transformimi e, mbi të gjitha, nga pritshmëritë ndaj saj, është një nga sipërmarrjet më të fuqishme të kryera në këto 3 dekada”, theksoi ai.
Kreu i Shtetit theksoi rëndësinë e kulturës së një hetimi profesional, të paanshëm e të pavarur si një tjetër gur kilometrik.
“Çrrënjosja e pandëshkueshmërisë dhe instalimi i kulturës së shtetarit si administrator i përgjegjshëm i interesit publik është një gur kilometrik. Zhvillimin sasior të saj e dallojmë nga numri i rasteve që ndiqen penalisht. Zhvillimin cilësor e dallojmë kur me kurajë, vendosmëri dhe drejtësi zbatohet ligji ndaj të fuqishmëve apo atyre që janë të paprekshëm. Kultura e hetimit profesional, të paanshëm dhe të pavarur është, gjithashtu, një gur kilometrik”, shtoi Begaj.
Ndërsa më tej vlerësoi dhe rëndësinë e ruajtjes të pastër të sistemit të drejtësisë.
“Vetingu permanent, kontrolli i brendshëm dhe vetëpastrimi zënë vend të rëndësishëm në gurët kilometrikë të drejtësisë së re. Drejtësia e re nuk mund të jetë e re nëse shfaq simptomat e drejtësisë së vjetër, si korrupsionin, klientelizminapo korporativizmin. Ajo duhet të shfaqë imunitet të padiskutueshëm dhe të jetë e padepërtueshme nga sëmundjet e vjetra. Drejtësia e re ka identitetin dhe moralin e njerëzve që e bëjnë dhe përbëjnë atë”, tha ai.
Ndërsa u shpreh i sigurt për suksesin gjatë fjalës së tij, Kreu i Shtetit apeloi që “drejtësia e re duhet pranuar si thirrje dhe kontributi për të duhet kuptuar si premtim solemn”.