Interesi i fermerëve për të përfituar nga subvencionet e Skemës Kombëtare 2026 ka qenë i lartë që në ditën e parë të hapjes së aplikimeve. Deri tani janë regjistruar rreth 10 mijë aplikime, ndërsa afati përfundimtar për dorëzimin e tyre është data 25 qershor.
Mes fermerëve që kanë aplikuar është edhe Adem Lushi nga Domja, i cili është paraqitur pranë zyrave të AREB në Tiranë për të përfituar mbështetje për blegtorinë e imët.
“Kam ardhur nga stanet në Domje për të aplikuar. Kam 270 dele dhe vij çdo vit këtu, sepse nuk kam mundësi ta bëj vetë në telefon”, u shpreh ai.
Këtë vit procesi i aplikimit në portalin e-Albania është thjeshtuar ndjeshëm. Sipas specialistëve, shumë veprime janë automatizuar, duke reduktuar kohën dhe procedurat që duhet të ndjekin fermerët.
“Për Skemën Kombëtare 2026, të dhënat që duhet të plotësojë fermeri janë minimale, me qëllim që aplikimi të jetë sa më i lehtë dhe i aksesueshëm”, tha specialistja Gerantina Llanaj.
Fermerët mund të aplikojnë edhe përmes telefonit celular, por një pjesë e madhe vijojnë të drejtohen pranë agropikave për asistencë.
Një nga ndryshimet kryesore këtë vit është rritja e mbështetjes financiare për blegtorinë. Sipas ekspertëve, subvencioni për krerët e bagëtive është rritur nga 1200 në 1500 lekë për kokë.
Ndërkohë, për herë të parë, fermerët nën moshën 40 vjeç do të kenë mundësinë të përfitojnë deri në 1 milion lekë të reja për investime në ndërtimin e stallave apo mbjelljen e parcelave bujqësore.