Presidentja e Republikës së Kosovës, Vjosa Osmani, ka nënshkruar sot Dekretin për mandatarin e ri të Qeverisë, duke i besuar këtë detyrë Albin Kurtit, pas rezultatit të zgjedhjeve të mbajtura më 9 shkurt 2025.
Ky vendim vjen në përputhje me kompetencat kushtetuese të Presidentes dhe pas propozimit zyrtar të Lëvizjes Vetëvendosje, partia që siguroi numrin më të madh të ulëseve në Kuvend.
Sipas nenit 95 të Kushtetutës së Republikës së Kosovës, mandatari për formimin e Qeverisë është i detyruar që brenda 15 ditëve nga dekretimi, t’i paraqesë Kuvendit përbërjen dhe programin qeverisës për votim e miratim.
Në një njoftim zyrtar nga Presidenca, Osmani i ka uruar suksese Kurtit, duke theksuar rëndësinë e formimit të shpejtë të një Qeverie me mandat të plotë kushtetues, që do të sigurojë stabilitet institucional dhe qartësi politike për vendin.
Ky është mandati i tretë që Albin Kurti merr për formimin e Qeverisë së Kosovës, në një moment kyç për proceset e brendshme politike dhe dialogun ndërkombëtar të vendit.