Një zjarr masiv në zonat veriore të Los Angelesit ka detyruar evakuimin e mijëra banorëve dhe qindra strukturave, njofton AP. “Canyon Fire”, i nisur dje pasdite, është përhapur me shpejtësi mbi 19.7 km² dhe po lëviz drejt lindjes, duke hyrë në zonat urbane.
Mbi 400 zjarrfikës, së bashku me avionë dhe helikopterë, janë angazhuar për të ndaluar përhapjen e flakëve, të cilat janë afër liqenit Piru dhe zonës rekreative Lake Castaic, e cila më parë u prek nga zjarri “Hughes”.
Kushtet e nxehta, të thata dhe me temperaturë rreth 38°C po favorizojnë përhapjen e zjarrit. Deri tani, 2,700 persona janë evakuuar dhe 700 struktura janë nën urdhër evakuimi, ndërsa mbi 14,000 banorë dhe 5,000 ndërtesa janë nën paralajmërim.
Autoritetet paralajmërojnë se rreziku nga zjarret do të mbetet i lartë në Kaliforni gjatë fundjavës, ndërkohë që një tjetër zjarr masiv në “Los Padres National Forest” vazhdon të digjet, duke djegur mbi 402 km² dhe kërcënuar shumë shtëpi.