Spanja po përballet me një sezon zjarresh të përmasave të mëdha, me dhjetëra vatra ende aktive dhe mijëra hektarë pyje të shkatërruara nga flakët.
Sipas autoriteteve, që nga fillimi i vitit janë regjistruar katër herë më shumë zjarre të mëdha krahasuar me të njëjtën periudhë të vitit të kaluar. Deri më tani, flakët kanë përfshirë mbi 100 mijë hektarë tokë, një sipërfaqe që përkon me mesataren vjetore të tokës së djegur në Spanjë gjatë dhjetë viteve të fundit.
Kryeministri Pedro Sanchez vizitoi një nga zonat më të prekura për të parë nga afër situatën dhe për të falënderuar ekipet e emergjencës të angazhuara në shuarjen e zjarreve. Gjatë vizitës, ai theksoi nevojën për bashkëpunim politik dhe rritjen e investimeve në parandalimin e fatkeqësive që lidhen me ndryshimet klimatike.
“Deri tani këtë vit kemi regjistruar katër herë më shumë zjarre të mëdha se në të njëjtën periudhë të vitit të kaluar. Mbi 100 mijë hektarë tokë janë djegur në të gjithë vendin, një shifër që përkon me mesataren vjetore të dekadës së fundit”, deklaroi Sanchez.
Kryeministri u bëri thirrje forcave politike të lënë mënjanë përplasjet partiake dhe të bashkëpunojnë për përballimin e asaj që ai e cilësoi si një kërcënim të përbashkët.
“Emergjenca klimatike kërkon veprime konkrete. Nuk mjafton vetëm të shuajmë zjarret, por duhet të investojmë gjatë gjithë vitit në masa parandaluese, ndërgjegjësim dhe politika që zbusin ndikimin e ndryshimeve klimatike dhe forcojnë aftësinë tonë për t’u përshtatur”, u shpreh ai.
Ndërkohë, autoritetet spanjolle vijojnë operacionet për vënien nën kontroll të vatrave, ndërsa temperaturat e larta, era e fortë dhe thatësira po e bëjnë edhe më të vështirë punën e zjarrfikësve. Edhe Franca po përballet me zjarre të mëdha, të favorizuara nga vala e të nxehtit që ka çuar temperaturat mbi 40 gradë Celsius.