Një zjarr ka rënë këtë të premte në qendër të Durrësit, pranë Kishës Katolike “Shën Lucia” dhe godinës së Bashkisë, duke alarmuar banorët e zonës.
Sipas informacioneve paraprake, flakët kanë përfshirë një banesë të pabanuar në lagjen nr. 3 të qytetit.
Ndërhyrja e forcave zjarrfikëse është vështirësuar për shkak të rrugicës së ngushtë dhe ndërtimeve të dendura në zonë, çka ka penguar mjetet zjarrfikëse t’i afrohen me shpejtësi vatrës së zjarrit.
Burime paraprake bëjnë me dije se objekti i përfshirë nga flakët është në qendër të një konflikti gjyqësor për pronësinë mes Kishës Katolike, pranë së cilës ndodhet godina, dhe një familjeje durrsake.
Ndërkohë, një tjetër vatër zjarri është raportuar edhe në zonën e Kallmit, ku flakët kanë përfshirë sipërfaqe me barishte.
Shkaqet e zjarreve nuk dihen ende, ndërsa autoritetet po punojnë për vënien e tyre nën kontroll dhe zbardhjen e rrethanave të ngjarjes.