Partia Demokratike zhvillon sot një mbledhje të rëndësishme të Kryesisë, me në qendër përgatitjet për zgjedhjet e pjesshme lokale që do të mbahen më 9 nëntor në gjashtë bashki të vendit, mes tyre edhe Tirana, ku opozita ende nuk ka shpallur kandidatët.
Gjatë mbledhjes, grupi i punës do të raportojë mbi procesin e bisedimeve me partitë aleate, për të arritur marrëveshje mbi përfaqësimin dhe mbështetjen e ndërsjellë në garë. Kjo është një fazë vendimtare për opozitën, e cila synon të paraqitet me kandidatë unikë në çdo bashki për të shmangur përçarjen e votës.
Po ashtu, pritet të diskutohen dhe të merren vendime mbi organizimin e brendshëm të procesit elektoral në këto gjashtë bashki, përfshirë strukturat lokale, logjistikën dhe strategjinë e fushatës.
Mbledhja e sotme konsiderohet një test i rëndësishëm për PD-në, e cila ndodhet në një moment kyç për të konsoliduar koalicionin opozitar dhe për të përcaktuar drejtimin elektoral në prag të garës së nëntorit.