Një konflikt i nisur për arsye banale ka degjeneruar në dhunë të rëndë dhe të shtëna me armë zjarri mbrëmjen e sotme në aksin Shkodër–Koplik.
Policia njofton se rreth orës 19:30, në Urgjencën e Spitalit Rajonal Shkodër është paraqitur i plagosur Edison Tirana, 42 vjeç, banues në Bericë, me dëmtime në kokë dhe trup, të shkaktuara dyshohet nga goditje me sende të forta.
Sipas të dhënave paraprake, 42-vjeçari është përfshirë në një sherr për motive të dobëta në hyrje të qytetit të Koplikut, ku disa persona e kanë goditur me mjete të forta dhe kanë qëlluar me armë zjarri në drejtim të makinës së tij. Fatmirësisht, plumbat nuk e kanë prekur, por pas të shtënave Tirana ka humbur kontrollin e automjetit, duke u përplasur me barrierat anësore të rrugës dhe ka përfunduar pranë një karburanti.
Pas ngjarjes, ai është larguar vetë nga vendi dhe është paraqitur në spital për të marrë ndihmë mjekësore.
Grupi hetimor vijon punën për zbardhjen e plotë të rrethanave dhe identifikimin e autorëve të përfshirë në sulm, me qëllim vënien e tyre para drejtësisë.