Kuvendi i Shqipërisë po shqyrton draftin e Amnistisë Penale, që parashikon përfshirjen e disa kategorive të të dënuarve dhe ndjekjes penale për veprat e kryera deri më 31 dhjetor 2025.
Sipas draftit, përfitojnë:
Personat e dënuar me vendim gjyqësor të formës së prerë, me dënime deri në 3 vjet për burrat dhe deri në 4 vjet për gratë, përfshirë edhe format alternative të dënimit si gjobë ose shërbim në komunitet.
Të dënuarit që ende vuajnë dënimin, me përjashtim për ata që u kanë mbetur më pak se 3 vjet burrave dhe 4 vjet grave.
Personat e moshuar, mbi 60 vjeç burrat dhe 50 vjeç gratë, si dhe të rinjtë që kanë qenë të mitur në kohën e kryerjes së veprës.
Por përjashtohen nga amnistia:
Ata që i janë shmangur drejtësisë, si të arratisurit apo të fshehurit.
Personat e dënuar për krime të rënda, përfshirë krimet kundër jetës, njerëzimit, terrorizmit, krime seksuale, krime kundër rendit kushtetues, autoritetit të shtetit, zgjedhjeve dhe demokracisë.
Të dënuarit me burgim të përjetshëm ose ata që gjykohen ose hetohen nga GJKKO.
Drafti gjithashtu parashikon uljen e dënimeve për disa kategori: burrat mund të përfitojnë 1 vit zbritje, ndërsa gratë dhe të miturit 1 vit e gjysmë, përveç rasteve të ndaluara për krime të rënda.
Një nga burimet ligjore thekson:
“Amnistia synon të përfshijë personat që kanë kryer shkelje të lehta ose mesatare, duke ruajtur përgjegjësinë për krimet më të rënda dhe për rastet që lidhen me korrupsionin dhe krimin e organizuar.”
Kjo amnisti pritet të sjellë një lehtësim në sistemin penal për rastet me dënime të shkurtër dhe të përforcojë fokusin ndaj krimeve më serioze, duke përjashtuar ata që cenojnë rendin kushtetues dhe interesin publik.