Detaje të reja kanë dalë nga hetimet për aksidentin tragjik në rrugën “Kastriotët” në Tiranë, ku humbi jetën një fëmijë 7-vjeçar.
Sipas burimeve nga grupi hetimor, i mituri u përplas fillimisht nga automjeti që drejtonte Tomorr Shukulli, 55 vjeç, dhe më pas nga mjeti i drejtuar nga Valentina Koltraku, 42 vjeçe. Pas përplasjes së dyfishtë, të dy drejtuesit janë larguar nga vendngjarja.
Policia ka bërë të mundur identifikimin dhe arrestimin e tyre, si dhe ka sekuestruar dy automjetet e përfshira në aksident.
Nga verifikimet e specialistëve të qarkullimit rrugor rezulton se Shukulli e ka transportuar fëmijën drejt spitalit, por gjatë veprimeve hetimore ka tentuar të mohojë dijeninë dhe përfshirjen në aksident, duke dhënë deklarime kontradiktore për rrethanat e ngjarjes.
Hetimet po vijojnë për të dokumentuar plotësisht përgjegjësinë penale të secilit prej të arrestuarve, ndërsa materialet i janë referuar Prokurorisë së Tiranës për veprime të mëtejshme.