YouTube ka befasuar përdoruesit me një ndryshim të papritur në faqen kryesore të platformës. Pa asnjë njoftim zyrtar, disa përdorues të versionit desktop kanë vënë re një dizajn të ri ku miniaturat e videove (thumbnails) shfaqen dukshëm më të mëdha, duke reduktuar ndjeshëm sasinë e përmbajtjes që duket në ekran njëkohësisht.
Ky ndryshim – që aktualisht duket të jetë pjesë e një faze testimi dhe jo i shtrirë për të gjithë – ka sjellë reagime të shumta negative në rrjetet sociale. Përdoruesit ankohen se tani në faqen kryesore shfaqen vetëm katër video njëherësh, gjë që kërkon më shumë kohë dhe ‘skrollim’ për të eksploruar përmbajtje të reja.
Disa kanë kërkuar zgjidhje alternative përmes shtesave të shfletuesve për ta rikthyer pamjen e vjetër, ndërsa të tjerë thjesht kanë ulur manualisht zmadhimin e faqes. Ka pasur edhe nga ata që menduan se bëhej fjalë për një defekt teknik, për shkak të mungesës së një reagimi nga vetë YouTube.
YouTube nuk ka komentuar ende në lidhje me ndryshimin, por përvoja ka treguar se ndryshime të tilla, edhe kur përballen me kritika, shpesh përfundojnë duke u bërë pjesë e përhershme e platformës.
Në një kohë kur ndërfaqja është bërë pjesë e përditshme e përdoruesve në mbarë botën, nuk është çudi që çdo ndryshim, edhe ai më i vogli, të shkaktojë zemërim – veçanërisht kur u kufizon qasjen e shpejtë ndaj përmbajtjes së preferuar.