Gjatë emisionit “Në Shënjestër” u transmetuan detaje të reja nga dosja e vrasjes së Jani Aliajt në burgun e Koridhalos në Greqi, ku fillimisht autori dyshohej të ishte një i burgosur grek, 28-vjeçari Kristos Vardhuniotis.
Sipas materialit të transmetuar, hetimet e mëtejshme zbuluan se vrasësi i vërtetë mund të ishte një shqiptar, Xhuliano Halili, 44-vjeç, nga Tepelena, i njohur për mënyrën mizore dhe të paskrupullt të ekzekutimit të krimeve. Halili kishte qelinë ngjitur me atë të Aliajt në sektorin nr. 3 të burgut.
Çuditërisht, Vardhuniotis, i dyshuari grek, ishte paraqitur vetë te autoritetet duke pretenduar se e kishte kryer vrasjen, pa pasur asnjë shenjë dhune në trupin e tij. Ndërkohë, Halili u identifikua me shenja gjaku dhe një histori kriminale të pasur me vrasje.
Në të kaluarën, Halili kishte vrarë një tjetër shqiptar, Alfons Ndoci, dhe ishte i njohur për lidhje me luftën brenda grupeve kriminale që kontrollojnë jetën e natës në Greqi. Vrasja e Aliajt dyshohet se lidhet me konfliktet brenda kësaj “mafie greke”, ku shqiptarë të rekrutuar me pagesë kryenin ekzekutime për interesa të jashtme.
Halili është i dënuar me burgim të përjetshëm si vrasës me pagesë dhe ka në CV-në e tij krime të tmerrshme, duke përfshirë edhe ekzekutimin e Fillim Mesajës dhe të birit të tij vetëm 2 vjeç, në Mesinia, si pjesë e larjes së hesapit midis Vasilis Varelas dhe Mesajës.
Në vitin 2018, Halili dhe Alfons Ndoci u arratisën nga Porti i Pireut, por u kapën shpejt. Më vonë, në qershor të vitit 2024, Halili vrau brenda burgut të Koridhalos Alfons Ndoci-n dhe plagosi Altin Vokrrin, gjithashtu me dyshime se ishte paguar nga jashtë burgut.
Krimet e tij nuk kishin vetëm viktima shqiptare; ai ka vrarë edhe shtetas grekë, përfshirë edhe kusërinjtë e tij, siç ishte ekzekutimi i kushëririt Sulo Halili në Skourta, Viotia, në vitin 2022, dyshimet e policisë greke lidhin këtë ngjarje me aktivitetin kriminal të Xhuliano Halilit.
Sipas hetimeve, Halili vepronte nën udhëzimet e mafiozit grek Vasilis Varelas, i njohur edhe për aktivitetet kriminale dhe trafikun e drogës në Greqi, pas një karriere të hershme si dublant në filmat e Chuck Norris në vitet ’80.