Që nga dita e vdekjes së 3 vajzave të mitura të cilat u vranë me thikë në një sulm në shkollë në Britani, shpërthyen protesta të dhunshme.
Mësohet se policia arrestoi 90 persona, të cilët hodhën shishe dhe plaçkitën dyqane si dhe sulmuan policinë. Zonat më të dhunshme janë vlerësuar Liverpool, Bristol, Blackpool dhe Belfast, ku qytetarët po organizojnë protesta kundër emigrantëve dhe myslimanëve.
Kryeministri Keir Starmer është zotuar t’u japë forcave policore “mbështetje të plotë” të qeverisë për të ndërmarrë veprime kundër “ekstremistëve” që po përpiqen të “mbjellin urrejtje”.
Sipas BBC, trazirat, më të përhapurat në vend në 13 vjet, shpërthyen pasi tre vajza u vranë në një sulm me thikë në një shkollë kërcimi në Anglinë veriperëndimore .
Dyshohet të kenë qarkulluar informacione të rreme në mediat sociale se i dyshuari për krimin ishte ekstremist mysliman, i cili ishte ilegalisht në Britaninë e Madhe.
Policia ka rrëzuar pretendimet duke njoftuar se i dyshuari për sulmin është Axel Rudakubana, 17 vjeç dhe ka lindur në Britani, por protestat e protestuesve anti-emigrantë dhe anti-myslimanë kanë vazhduar dhe janë përshkallëzuar në incidente të dhunshme.
Shumë oficerë policie u plagosën ndërsa u përpoqën të minimizonin përleshjet fizike midis qindra protestuesve që i përkisnin palëve kundërshtare./ BBC