Një tjetër valë dhune ka tronditur Meksikën, ku të paktën 10 persona, përfshirë fëmijë, humbën jetën pas një sulmi me armë zjarri në qytetin Irapuato, në shtetin e Guanajuatos, një nga rajonet më të goditura nga krimi i organizuar në vend.
Sipas autoriteteve dhe mediave lokale, të martën mbrëma persona të armatosur hynë në një shtëpi ku po zhvillohej një festë fetare dhe hapën zjarr pa dallim ndaj të pranishmëve. Si pasojë, 10 persona mbetën të vdekur dhe 12 të tjerë u plagosën. Mes të plagosurve është edhe një fëmijë 2-vjeç, i cili u qëllua në sy dhe ndodhet në gjendje kritike.
Presidentja meksikane Claudia Sheinbaum e cilësoi ngjarjen si një “vrasje të tmerrshme masive” dhe deklaroi se hetimet janë duke u zhvilluar intensivisht për të identifikuar dhe kapur autorët.
Policia ka nisur një operacion të gjerë në zonë, ndërsa qytetarët janë në ankth për shkak të rritjes së rasteve të dhunës. Sipas statistikave zyrtare, kjo është masakra e 17-të në shtetin Guanajuato vetëm për vitin 2025, duke e konsoliduar statusin e tij si rajoni më i dhunshëm në Meksikë.