Artisti rus i opozitës Semyon Skrepetsky u vra në Poloni. Ai ishte i njohur për karikaturat e tij të mprehta politike të Vladimir Putinit.
Sipas Zyrës së Prokurorit të Shtetit polak, artisti rus opozitar Semyon Skrepetsky u qëllua për vdekje me pesë të shtëna nga afër në mes të ditës. Semyon Skrepetsky u qëllua në qytetin Biała Podlaska në Poloni, jo shumë larg kufirit me Bjellorusinë.
Autori i dyshuar është arrestuar ndërkohë (19.06.2026). Ministri i Brendshëm i Polonisë, Marcin Kierwinski, tha se personi 36 vjeçar i ndauar, është me prejardhje nga Gjeorgjia. Sikurse deklaroi në konferencën e shtypit ministri, personi dyshohet se ka lidhje me krimin e organizuar si dhe me disa krime të kryera në Poloni që nga viti 2022.
Sipas autoriteteve, Skrepetsky u vra më 15 qershor rreth orës 9:50 të mëngjesit pranë apartamentit të tij në Biała Podlaska. Tre nga pesë të shtënat e goditën atë kur ai ishte i shtrirë në tokë. Skrepetsky vdiq në vendin e krimit, prej nga autori u largua.
Pesë gëzhoja dhe një plumb Luger 9 mm u gjetën në vendin e krimit. Është i njëjti municion që u përdor në vitin 2019 në Berlin në të ashtuquajturën “vrasje në Tiergarten”, kur u vra komandanti ushtarak çeçen Zelimhan Hangoshvili. Piloti i helikopterit rus Maksim Kuzminov, i cili kaloi në anën ukrainase, u vra gjithashtu në vitin 2024 në Spanjë me të njëjtin armë kalibri, raporton portali i pavarur rus Agency.
Vrasje me motive politike?
Gjithçka tregon se kjo është një vrasje politike, tha Kryeministri polak Donald Tusk këtë të martë (17 qershor) në një konferencë për shtyp. Megjithatë, ai theksoi se është e nevojshme të pritet mbledhja e provave dhe të dhënave shtesë. Nëse rezulton se vrasja është kryer me urdhër të Rusisë, do të ishte një rast shumë serioz me rëndësi ndërkombëtare, tha Tusk. “Ky do të ishte terrorizëm shtetëror”, shtoi Kryeministri polak.
Mediat polake e përshkruajnë Skrepetsky si një kritik të presidentit rus Putin dhe pyesin veten nëse vrasja ishte e urdhëruar. “Duket si një ekzekutim”, tha një zyrtar i njohur me rrethanat e çështjes për portalin polak Onet.
Edhe artisti bjellorus Vlad Bokhan, i cili ishte në kontakt me Skrepetsky pak para vdekjes së tij, beson se vrasja mund të ketë një sfond politik. “Kjo vrasje nuk ishte vetëm për të eliminuar një person, por edhe për të frikësuar.” “Kjo u dërgon një mesazh të gjithë atyre që merren me aktivitete të ngjashme”, tha Bokhan për DW.
Postimi i fundit në Telegram përmbante kërcënime
Emri i vërtetë i Skrepetsky ishte Robert Kuzovkov. Ai lindi në vitin 1981 në Rusi dhe deri në vitin 2021 jetoi në rajonin Altai të Siberisë. Më pas, nga frika epersekutimit politik, ai iku në Poloni, ku iu dha statusi i mbrojtjes.
Ai njihej kryesisht për karikaturat e tij politike, duke përfshirë ato të Presidentit rus Vladimir Putin, udhëheqësit çeçen Ramzan Kadyrov, politikanit të ndjerë të opozitës ruse Alexei Navalny dhe udhëheqësit bjellorus Alexander Lukashenko. Përveç kësaj, ai organizoi aksione proteste në qytete të ndryshme evropiane.
Postimi i fundit që Skrepetsky postoi në kanalin e tij Telegram disa orë para vdekjes së tij përbëhej nga video të kërcënimeve që mori pas veprimit të tij të fundit jashtë ambasadës ruse në Berlin më 12 qershor.
Gjatë atij veprimi, artisti mbante në duar një nga karikaturat e tij. Fotografia tregon diktatorin sovjetik Joseph Stalin duke përqafuar Presidentin rus Vladimir Putin në krahë si një fëmijë të vogël. Një flamur rus dilte nga vrima në pantallonat e Skrepetsky, të cilin ai po e tërhiqte zvarrë përtokë. Pas kësaj, e hodhi në koshin e plehrave.
Rusi 2026 | Njerëzit përkujtojnë Alexei Nawalny
Kolegët: Skrepetsky merrte vazhdimisht kërcënime
“Mendoj se pas këtij aksioni në Berlin, dikush dha urdhër për ta eliminuar”, supozon Andrej, një aktivist i diasporës bjelloruse në Biała Podlaska. Për arsye sigurie, ai nuk ka dashur të zbulojë publikisht emrin e tij të plotë apo emrin e vërtetë.
Ai u takua me Skrepetsky në vitin 2021. Në atë kohë, artisti mori pjesë vazhdimisht në protestat kundër luftës të organizuara nga bjellorusët dhe ukrainasit në qytet.
Hera e fundit që e pa, thotë ai, ishte javën e kaluar. Kishte përshtypjen se Skrepetsky ishte “pak i frikësuar”. Në të njëjtën kohë, në një intervistë për DW, ai e cilësoi Biała Podlaskën si një qytet të qetë dhe të sigurt dhe beson se Skrepetsky e zgjodhi këtë qytet si vendbanim. “Këtu nuk ka sekrete. Ti njeh çdo makinë dhe çdo njeri”, thotë Andrej. “Skrepetsky ka pesë fëmijë, gruaja e tij tani është shtatzënë me të gjashtin dhe është më e lehtë të jetosh në një qytet të vogël me një familje të madhe”.
Sipas fjalëve Vlad Bokhan, Skrepetsky ka qenë veçanërisht i angazhuar në organizimin e aksioneve të reja në rrugë muajt e fundit. “Ne folëm më pak se 24 orë para vrasjes. Ai foli për ide të reja dhe sugjeroi të organizonim diçka së bashku – Varshavë ose Berlin. Ai donte të vazhdonte të punonte dhe po bënte plane.”
Bokhan tha se Skrepetsky vazhdimisht merrte kërcënime nga qarqe të ndryshme. Duke qenë se ai nuk i kurseu kritikat ndaj autoriteteve ukrainase, të dhënat e tij personale, përfshirë adresën dhe llogaritë e tij në rrjetet sociale, përfunduan në një bazë të dhënash të diskutueshme ukrainase. Platforma e internetit “Myrotvorec” (“Paqebërësi”) prej vitesh mban një lloj regjistri publik të personave që, sipas saj, “paraqesin kërcënim për sovranitetin dhe integritetin territorial të Ukrainës”./DW